తాజా వార్తలు

Friday, 7 April 2017

తాటిక‌ల్లు తాగ‌డం ఎంత మంచిదో తెలుసా??

జా తాటిక‌ల్లు తాగ‌డం.. ప్ర‌యోజ‌న‌క‌ర‌మేనట. తాటికల్లులో ఉండే ఒక‌ సూక్ష్మజీవి మ‌న‌ కడుపులో క్యాన్సర్‌ కారక సూక్ష్మజీవిని నాశనం చేస్తుంద‌ట‌. అంతేకాకుండా కొన్ని రకాల వ్యాధికారక సూక్ష్మజీవులను కూడా ఇది అంతం చేస్తుంద‌ట‌. ఉస్మానియా విశ్వవిద్యాలయం చేసిన రీసెర్చ్‌లో తాజాగా ఈ విష‌యం బ‌య‌ట‌ప‌డింది. ఈ పరిశోధనను ఐఐసీటీ (ఇండియన్‌ ఇనిస్టిట్యూట్‌ ఆఫ్‌ కెమికల్‌ టెక్నాలజీ) కూడా ధ్రువీకరించింది.

ఓయూకు చెందిన బ‌యాల‌జీ ప్రొఫెస‌ర్‌ తన బృందంతో క‌ల‌సి ఏడాది కాలంగా తాటికల్లుపై రీసెర్చ్‌ చేస్తున్నారు. దీని కోసం తెలంగాణ‌లోని ఖమ్మం, వరంగల్ ప్రాంతాల నుంచి 53 రకాల తాటికల్లు నమూనాలను సేకరించారు. ప్రయోగశాలలో.. సూక్ష్మజీవులను వృద్ధి చేయ‌డానికి ఉపయోగపడే ఒక ఉత్ప్రేరకంలో కల్లు డ్రాప్‌ వేసి 48 గంటలు ఇంక్యుబేటర్‌లో పెట్టి, అందులో నుంచి వృద్ధి చెందిన‌ సూక్ష్మజీవులను ప‌రిశీలించారు. వాటిని డీఎన్‌ఏ టెస్టు కోసం పంపించి.. ఫలితాల‌ను విశ్లేషించారు. చివ‌ర‌గా.. వీటిలో 18 రకాల సూక్ష్మజీవులు మాన‌వుడిలోని వ్యాధికారక సూక్ష్మజీవులను చంపుతున్నట్లు గుర్తించారు. ఈ ప‌రిశోధ‌న‌కు ఐఐసీటీ శాస్త్రవేత్తలు సహక‌రించారు.
ఈ సూక్ష్మజీవులు మనం తీసుకునే యాంటీబయాటిక్ ఔష‌ధాల‌ను కూడా తట్టుకుంటున్నట్లు పరిశోధనలో తేలింద‌ట‌. తాటికల్లులో గుర్తించిన సూక్ష్మజీవుల‌కు.. జీర్ణవ్యవస్థలోని సహజసిద్ధ సూక్ష్మజీవులతో సహజీవనం చేయడం, వ్యాధికారక సూక్ష్మజీవులను నిరోధించడం, ప్రతికూల పరిస్థితులను తట్టుకోవడం, జీర్ణాశయ కణాలతో సంశ్లేషణ చేయ‌డం త‌దిత‌ర‌ లక్షణాలు ఉన్నాయ‌ట‌. తాజా కల్లు తాగితేనే ఈ ఫలితాలు అందుతాయ‌ట‌. పులిసిన కల్లు మాత్రం.. ఆరోగ్యానికి హానికరమే అంటున్నారు ప‌రిశోధ‌కులు. ఈతకల్లులో కూడా ఇవే లక్షణాలు ఉండొచ్చ‌ని భావిస్తున్నారు. క‌ల్లు ప్రియుల‌కు చ‌ల్ల‌ని క‌బురే క‌దా! ఇది.
« PREV
NEXT »

No comments

Post a Comment