తాజా వార్తలు

Wednesday, 3 May 2017

ఇవి ఆహారంగా తీసుకుంటే పొట్ట కరగాల్సిందే!

ఆహార అలవాట్లలో మార్పులు, అనారోగ్యకరమైన జీవనశైలి కారణంగా చాలా మందిలో యుక్త వయసులోనే పొట్ట పెరిగిపోతోంది. బాన కడుపు చూడటానికి అసహ్యంగా ఉండటమే కాకుండా అసౌకర్యంగానూ ఉంటుంది. భారీ పరిమాణంలో పొట్ట భాగంలో కొవ్వు పేరుకుపోవడం అనేక రోగాలకు దారితీస్తుంది. అవసరమైన దాని కంటే ఎక్కువ మోతాదులో ఆహారం తీసుకోవడం వల్ల పొట్ట పెరిగిపోతుంది. పొట్టను తగ్గించుకోవడానికి చాలా మంది వాకింగ్, ఎక్సర్‌సైజ్‌లు చేయడంతోపాటు ఆహారం తీసుకోవడం కూడా తగ్గిస్తారు. కానీ ఫలితం కనిపించదు. కొన్ని రకాల ఫుడ్స్‌కి పొట్టలో పేరుకుపోయిన కొవ్వును కరిగించే శక్తి ఉంది.

అతిగా ఆహారం తీసుకోవడాన్ని తగ్గించడంతోపాటు, పోషకాలున్న ఆహారం తీసుకోవడం వల్ల బెల్లీ ఫ్యాట్‌ను తగ్గించవచ్చు. ఆపిల్ పండ్లను ఆహారంగా తీసుకోవడం వల్ల కాసేపటికే పొట్ట నిండిన భావన కలుగుతుంది. పీచు పదార్థాలున్న ఆపిల్‌ను రెగ్యులర్‌గా తినడం వల్ల తక్కువ మోతాదులో అన్నం తింటాం.

అవకాడో ఫ్రూట్స్‌లో శరీరానికి అవసరమైన పోషకాలు పుష్కలంగా ఉంటాయి. వీటిలో అధికంగా ఉండే పీచు పదార్థాలు ఆకలి వేయకుండా చూస్తాయి. అవకాడోలోని మోనోశ్యాచురేటెడ్ ఫ్యాటీ ఆమ్లాలు బెల్లీ ఫ్యాట్‌ను కరిగిస్తాయి.అతి తక్కువ కేలరీలు ఉన్న ఆహారం కీరదోస. ఇందులో దాదాపు 96 శాతం నీరు ఉంటుంది. ఒక కీరదోసలో కేవలం 45 కేలరీలు మాత్రమే ఉంటాయి. కాబట్టి కీరదోసను రోజువారీ ఆహారంలో భాగం చేసుకోవడం వల్ల త్వరగా కడుపు నిండిన భావన కలగడంతోపాటు పొట్ట భాగంలో పేరుకుపోయిన కొవ్వు కరుగుతుంది.

ఆకు కూరలు, కూరగాయలను ఎక్కువ మోతాదులో తీసుకోండి. ఆకుపచ్చని కూరగాయలు, ఆకు కూరల్లో తక్కువ కేలరీలు ఉంటాయి. వీటిలో పీచు ఎక్కువగా ఉండటంతోపాటు శరీరానికి అవసరమైన ముఖ్యమైన విటమిన్లు, ఖనిజాలు అధికంగా లభిస్తాయి. ఆకుకూరలను అధికంగా తీసుకోవడం వల్ల కడుపు ఉబ్బరం నుంచి బయటపడొచ్చు.

బీన్స్‌ను ఆహారంగా తీసుకోవడం వల్ల ఒంట్లో పేరుకుపోయిన కొవ్వు కరిగిపోతుంది. కండరాల పెరుగుదలకు దోహదపడటంతోపాటు జీర్ణక్రియ పెరిగేందుకు బీన్స్ ఉపయోగపడతాయి. వీటిని ఆహారంగా తీసుకోవడం వల్ల త్వరగా కడుపు నిండిన భావన కలగడంతోపాటు ఎక్కువ సేపు ఆకలేయదు. ఫలితంగా అతిగా తినడం తగ్గుతుంది.

పుచ్చకాయలో 82 శాతం నీరే ఉంటుంది. దీన్ని ఆహారంగా తీసుకోవడం వల్ల ఒంట్లో పేరుకుపోయిన అదనపు కొవ్వు నిల్వలను తొలగిస్తుంది. విటమిన్ సి పుష్కలంగా లభించే పుచ్చకాయల్లో కేలరీలు తక్కువగా లభిస్తాయి. ఒక కప్పు పుచ్చకాయ ముక్కలను ఆహారంగా తీసుకుంటే శరీరంలోకి దాదాపు 100 కేలరీలు మాత్రమే చేరతాయి. కాబట్టి స్నాక్స్‌గా పుచ్చకాయ ముక్కలను తినడం వల్ల చక్కటి ఫలితం ఉంటుంది. సమ్మర్లో వేడి బారి నుంచి కూడా ఉపశమనం లభిస్తుంది.
« PREV
NEXT »

No comments

Post a Comment